ඔයාල මගේ බ්ලොග් එක එක්ක ටිකක් විතර ළඟින් ආශ්‍රය කරනව නම් දන්නවා ඇති කවුද hal597 කියන්නේ කියලා. එයා ගැන හැඳින්වීමක් මම කලිං ලියපු “පරිගණකයයි මමයි.” කියන ලිපියෙත් දාල තිබ්බා. ඒ ටික මම මෙතනත් උපුටා දක්වන්නම්.

මගේ පරිගණකය ගත්තේ 2006/06/01 දින (අපරාදේ.. 06-06-06 ගැන කලිං හිතුන නං 6 වෙනිද ගන්නවා!:P). මම මේ පරිගණකයට දාලා තියන නම තමයි “hal597″. මේ නම හැදුනු හැටිත් පොඩි කතාවක්.

ඔයාල කියවල තියෙද ආතර් චාල්ස් ක්‍ලාක් මහත්තයගෙ 2001,2010, 2061 සහ 3001 කියන පොත්? ඒ කතා පෙළේ සඳහන් වෙන ඩිස්කවරි යානාවේ කෘත්‍රීම බුද්ධිය සහිත පරිගණකය තමයි “HAL 9000“, එයාට පෘථිවියේ තව සහෝදරියකුත් ඉන්නවා “SAL 9000” කියලා. ඉතිං ඔන්න ඔතනින් තමයි මගේ පරිගණකයේ නමේ “hal” කෑල්ල ආවේ. එතකොට 597, ඒක තමයි මගේ පරිගණකයේ වේගය, 597MHz.

Share

ඕං ඉතිං පහුගිය බදාදා උදෙත් මම මේකෙ වැඩ කරලා ඉස්කෝලෙයි පංතියි ගිහිං ගෙදර ඇවිත් ඉස්සෙල්ලාම සපුරදු පරිදි ඔන් කළා මැසිම. කොහෙද, සුවිච්චෙක එබුවට වැඩක් නෑ නෝ හෙල්ලුං! :O

ආහ්, මහ දෙයක් වෙන්න බෑ, පවර් සුවිච්චෙක අස්පට් ගහල වෙන්ටැ කියල හිතාන මම කේසින් එක ඇරලා පවර් සුවිච්චෙකට එන වෑර් දෙක සුවිච්චෙකෙං ගලෝලා කෙලිංම සම්බන්ධ කළා. එහෙම කරළා කරන්ට් එක දුන්නා. ම්හු, වැඩ කොරන්නෙ නෑහ්!

මැසිමට කරන්ට්ටෙකත් එනවා, හැබැයි පවර් සප්ලයි යුනිට් එකෙං ඇතුලට කරන්ට් එක එන්නෙ නෑ. ඒකට බඩු හරි වෙලා තමයි. එදා දවල් තදින් අකුණුත් ගැහුව කියල අම්ම කීව, ඒත් කොම්පූටරේ ඔෆ් කොරල තියෙද්දි ගහන අකුණු මේක කැඩෙන්න බලපෑවද කියන එක නම් මට සැකයි. හැබැයි ඉතිං පවර් සප්ලයි එකේ ඇතුලෙ ධාරිත්‍රක වලත් විද්‍යුතේ සැලකිය යුතු ප්‍රමාණයක් තියනව නොව.

ඉතිං මොකක් කරන්නද? මගේ දුකට සැපට – සැපට දුකට ඕන එහෙකට මාත් එක්ක ඉඳපු මගේ මිත්තරයා සමු අරං! දුක තමා.

සමහරු තමංගෙ පරිගණකෙට කෑල්ල කියල කීවට මටනං මේක කෑල්ලක් වගේ පෙනුනෙ නෑ. මේක මම දැක්කෙ මගෙ බොක්ක එහෙම නැත්තං හොඳම ප්‍රෙන්තෙක් විදියට.

තමංගෙ වේගෙ 597MHz උනත් ගේම් ගහන්නෙ නැති, 3D අනං මනං ඩිසයින් කරන්නෙ නැති, වෙන වෙන “බර” වැඩ මොනවත් කරන්නැති මට ඒක හොඳටම සෑහුනා. තමංගෙ බොස් වෙනුවෙං කරත්ත සීයක් එකපාර ඇදල දුන්නු නන්දිවිසාල වෘෂභයා වගේ hal597 තමංගෙ උපරිමෙන් මට බොක්ක දුන්නා.

තඩි තඩි කොම්පීටර් තියාගෙන ෂෝ එක දාන අපේ සමහර එවුංට වඩා සිය දහස්ගුණේක වැඩ මම මේකෙං කරගත්තා. බැරිමරගාතේ හරි hal597 කෝමහරි ඒ ඔක්කොම කරලත් දුන්නා!

කොහොම උනත්, ගිය බදාදා ඒක කැඩුනට පස්සෙ මට තේරුනා මේක ප්‍රතිසකස්කරන්න ට්‍රයි කරන එකේ තේරුමක් නැති විත්තිය. ඉතිං මම තීරණේ කළා තවත් පාවිච්චි කරපු පරිගණකයක් ගන්න.

ඊයෙ (27) අළුත් කොම්පීටරේ ගෙනාවා. බලමු මූටත් මට බොක්ක දෙන්න පුළුවං වෙයිද කියලා.

සකසනය Intel Pentium IV 3.00 GHz සහ මතකය 512MB තමයි ඒකෙ ප්‍රධාන පිරිවිතර.

96MB වීඩියෝ මතකයක් තියන නිසා hal597 හි 8MB වීඩියෝ මතකය මදි නිසා සක්‍රීය කරන්න බැරි උනු  අනං මනං තොරං ටිකත් මේකෙ වැඩකරන්න ඇහැකි.

මගේ පරිගණක නම් තැබීමේ ක්‍රමවේදය අනුව මේකෙ නම තමයි hal3000!